بانكوك عاصمة تايلاند من اجمل البلاد اللي زرتها... و الحقيقة اني زرتها اكتر من مرة .و كنت اذهب اليها في شهر الاجازة السنوية بتاعي علشان هي بلد ممتع جدا سواء من ناحية المناظر الطبيعية او الاماكن الاثرية او التسوق و المشتريات الراقية جدا و اسعارها معقولة جدا جدا اصلية كانت ام تقليد فهم فعلا بارعون في تقليد الماركات العالمية حتى انه لا يستطيع التميز سوا خبير .

افضل وقت تزور فيه بانكوك هو شهر ديسمبر و يناير علشان الجو في الوقت ده بيكون صيفي جميل مفيش امطار استوائية و لا حر و رطوبة 
و انا من هواة المشى و اي بلد في العالم زرته سواء عمل او اجازة لازم امشي في شوارعه علشان اكتشفه و الحقيقة الموضوع ده عرضني لبعض المواقف الغريبة لكن ربنا كان بيسترها و تعدي.. 
طبعا ممكن اركب الموصلات سواء اتوبيس او مترو او تاكسي .. لكن دول بيكونوا في مرحلة العودة بعد ما اتهد من المشى 🙂 
في اول مرة ازور فيها بانكوك .. لما وصلت وسط البلد و في منتصف الشارع اللي فيه الفندق اللي ساقيم فيه استقبلني فيل عظيم مهيب الهيئة .. السيد فيل كان وسيلة ركوب عادية بس مش منتشرة .. الفيل مقدس عندهم و مصدر من مصادر التفاؤل خاصة في حال رفع قدميه الاماميتين لاعلى علشان كده دايما يبيعوا نماذج للفيل و هو في الوضعية دي .
و في بانكوك شفت التوك توك لاول مرة بس صراحة مختلف تماما عن اللي عندنا اللي عندنا نفس الموجود في الهند و باكستان و بنجلاديش و نفس الكآبة .. توك توك بانكوك مبهج بالوانه و شكله المختلف تماما من حيث الحجم و السعة و يعتبر وسيلة مواصلات اساسية في الشوارع الرئيسية هو و الموتوسيكل.
اهم حاجة في شرق آسيا بجد النظافة قليل جدا منهم قذر الهيئة او له رائحة منفرة ..حتى الشحاتين شكلهم مقبول .. الاماكن الشعبية الفقيرة جدااا غاية في النظافة و تفوح منها روائح عطرة و دايما فيها زرع اخضر يزين المكان  
العاصمة القديمة لتايلاند من اجمل الاماكن الممكن زيارتها .. لازالوا محتفظين بها كما هي الاماكن الخضراء فيها و المباني الخشبية هي هي لم تتبدل .. تعتبر منطقة اثرية و مفيش فيها سكان غير رهبان بوذا قليلي العدد .. معبد بوذا في العاصمة القديمة فيه تمثال صغير الحجم لبوذا كله منحوت من الزمرد موضوع في مكان عالي لا تصله يد لكن العين تقدر تشوفه كويس جدا و بيطلبوا منك انك تجلس احتراما له علي الارض الخشبية النظيفة .. 
و المعبد اسمه Emerald Buddha 
العاصمة القديمة هي فعلا مكان هادي جميل .
في طريقي انا و زوجي للعاصمة القديمة ركبت اتوبيس علشان ده مشوار و الاتوبيس معقول في سعته و عدد ركابه و الواقفين فيه محدودي العدد.
المهم حصل موقف غريب و عجيب .. حصل اني كنت انا و زوجي واقفين مفيش كراسي فاضية .. و حصل ان في راكب نزل فجلست في الكرسي اللي اصبح خالي .. و حصل اني مش انتبهت لمين اللي قاعد جنبي لاني كنت بتكلم مع زوجي .. بس اللي حصل بعد كده حاجة في منتهي الغرابة .. اللي قاعد جنبي كان من رهبان بوذا و رجل كبير و لم اشعر الا و صوت غريب و الفاظ عجيبة - لان حروف لغتهم تخرج من الانف فتحس انهم خُنف- فنظرت بجانبي لقيت الرجل غضبان جدا و لما عبرت بوجهي و يدي عن عدمي فهمي- لان لغة الجسد صراحة دي لغة عالمية - هو فهم قام شاور علي زوجي انه يقعد جنبه و انا اقوم و مش مهم اقف .. طبعا مش محتاجة تفسير انا إمرأة و لا يحل له الجلوس جنب امرأة دي خطيئة ..و طبعا قمت و زوجي هو اللي قعد جنبه 🙂 ... و فعلا الرجل هدأ تماما  
و انا في سري قلت حتى انتم يا قوم بوذا

💖
توتة

تعليقات

إرسال تعليق

المشاركات الشائعة من هذه المدونة

صورة
في العلاقات العاطفية بين البشر هناك إشارات يتم ارسالها دون وعي من اطرافها او بالاصح عدم ملاحظاتهم لتلك الإشارات المتمثلة في تصرفات طرفي العلاقة .. يحدث ان يختلط الأمر على احد أطرافها فيظن انه امتلك الطرف الآخر الذي تدل تصرفاته على شدة حبه و تمسكه بالعلاقة و محاولة المحافظة عليها و عليه فهو له كامل الحق في التصرف في مشاعر هذا المُدَله في حبه و اللعب بها و الاستمتاع بعملية الدفع و الجذب .. و الحقيقة ان الاحتمال له ذروة و زي الست ما غنت للصبر حدود   و عليه يأتي الوقت الذي يرفع هذا المُدَله في الحب يده قائلا  سلام … الموضوع انتهى يحدث ان يتصرف طرف بكل صدق و وضوح فيظن الطرف الآخر ان هذا ضعف و قلة حيلة و ان هذا الوضوح و الصدق هو شأن صاحبهم .. يعني انت اللي بتتصرف كده و انا مختلف عنك و عليه تتحمل نتيجة هذا التصرف.. و الحقيقة انه فعلا كل واحد بيتحمل نتيجة تصرفه و يحصد ما زرع و لكن احيانا بتكون الزراعة في ارض صخرية يحاول اصلاحها فيفشل.. و هنا يأتي الوقت الذي يكتشف فيه هذا الصادق  ان كل محاولاته ذهبت أدراج الرياح فيرفع يده  سلام  ... الموضوع انتهى و يحدث ان تكون العل...
قراءة المزيد
صورة
دَعْ كلَّ قلبٍ في الحياةِ على هواهْ فلكلِّ قلبٍ في الحياةِ حَياةْ والعشقُ بالنيَّاتِ يأتي إن أتَى ولكلِّ قلبٍ في الهوى ما قد نَواهْ مهما بَكينا في الهوى مِن جُرحِنا مهما تَمادتْ في القلوبِ الآهْ سنظلُّ دومًا أوفياءَ لجُرحِنا إن الجراحَ مساجدٌ للهْ فيها المناسكُ للقُساةِ قلوبُهم حتى تَحِنَّ وفي الحنينِ صلاةْ شقَّتْ دُموعي فجأةً وقتَ التضجُّرِ بَسمةٌ فسألتُهم : مَن شقَّها؟ مَن شقَّني في الحبِّ ؟ يا حُبَّاهْ ! ضَحِكَتْ وقالتْ بعدَها : لا تَبتئسْ "موسى" وألقَى في الدموعِ عصاهْ أنا دعوتي للهِ كانتْ صادقةْ يا ربَّنا قد مسَّني شوقٌ على شوقٍ فزدْني في الهوى شوقًا لها حتى نَذوقَ من الجوى ضِعفَ الذي ذُقْناهْ واغفرْ لقلبي في الهوى ما قد تقدَّمَ أو تأخرَ واهدِني واصدُقْ لقلبي في الهوى رُؤياهْ قولوا لمن مِني اشترتْهُ في الحياةِ بِحُبِّها القلبُ عندَكِ فاكرمي مثواهْ ولتعلمي إن كانَ ذنبي في الحياةِ بأسرِها حبي لكِ .. فاللهُ يعلمُ أنهُ ذنبٌ وحيدٌ ما ارتكبْتُ سِواهْ #عبدالعزيز_جويدة painting by: Nathalie Mulero Fougeras - French
قراءة المزيد
صورة
  "يا ترى اللي بيعيش الزمن إحنا ولاّ الزمن هو اللي بيعيشنا" سيد حجاب   رؤيتي هي ان احنا بنعيش زمن ما و بعد ان ينقضى هذا الزمن يعيش هو فينا  اي دقايق جميلة شعرنا فيها بالحياة.. اي لحظات سعيدة احسسنا فيها بالفرحة.. اي ثواني تنسمت فيها عيوننا رؤية احبابنا .. الوقت ده هو الزمن اللي إحنا بنعيشه ..  لما نتذكر هذه الاوقات الحلوة و الايام الهنية.. الوقت ده بيكون الزمن هو اللي بيعيشنا ..  الذكرى هي الزمن اللي عايش فينا         توتة
قراءة المزيد