في أغلب مطارات العالم يكون مكان خروج طاقم الضيافة الجوية مغاير لمكان خروج الركاب العاديين ..
و في هذه الحال يستلم الطاقم حقائبه غير اليدوية من الحاوية - الكونتينر- الخاص بهم و الذي يتم نقله لهذا المخرج..
حدث لي موقف في احدى الرحلات و اللي كانت متجهة لدولة شقيقة..
و زي أي مطار في العالم ممكن يحصل تفتيش مفاجئ لطاقم الضيافة ..
يعني في أي رحلة تتوقع ان يحدث تفتيش او لا يحدث ..كل واحد و حظه 🙂
التفتيش يتعلق بالممنوعات وكان الكشف عنها من اختصاص كلاب مدربة ضخمة الحجم لا تتعرض الا للحقائب .. يعني مش بتهاجم بني آدم الا طبعا لو اكتشفت انه حامل لمواد ممنوعة.
الكلب الضخم في المحطة دي كان وديع في ملامحه و نظرات عيونه و كان اسمه “سلطان” كنت باحبه جدا و كان يصعب عليا لأنه في النهاية بيتم اطلاق الرصاص عليه لما يوصل لمرحلة معينة من الادمان.
اختصاص سلطان الكشف عن المواد المخدرة و كان له زميل كلب آخر مختص في الكشف عن السلاح 
المهم في الرحلة دي حصل شئ غريب .. سلطة الجمارك قررت تعمل تفتيش مفاجئ بس في ممر الركاب اللي هو بيوصل لصالة المطار و طلبوا منا وضع الحقائب اليدوية على الارض و طلع الاستاذ سلطان علشان يمر عليها ليكتشف بحاسة الشم الجبارة عنده اذا كان في ممنوعات ام لا !
و بعد كده الاتوبيس الخاص نقلنا لمخرج الملاحين علشان كل واحد ياخد شنطة السفر الخاصة به من كونتينر الملاحين.
انا 👩‍✈️و زميل 🧑‍✈️فقط لم نجد حقائبنا و طبعا اندهشنا و اتهمنا العمال في محطة القاهرة انهم نسوا يضعوهم في كونتينر الملاحين
دخلنا حجرة التفتيش الجمركي ففوجئت بشنطتي علي جنب و كذلك شنطة زميلي و من فرحتي قلت شنطتي أهه موجودة هنا لان الرحلة كانت خمسة ايام و اكيد محتاجة لكل الموجود فيها .. 
ضابط الجمرك نظر لي نظرة ذات معني و قالي دي شنطتك قلت له ايوه دي شنطتي..
طيب انتظري لما كل الملاحين يمشوا و نفس الكلام كان لزميلي !
طبعا انا و زميلي نظرنا لبعض مش فاهمين .. 
المهم كل الطاقم انصرف و لم يبق غيرنا احنا الاتنين..
ابتدوا به هو .. تفتيش دقيق لكل قطعة من ملابسه و ادواته الشخصية ..
مفيش عنده حاجة.
و كل ما نسأل في ايه يا قوم يكون الرد نظرات مريبة 🤫..
جه دوري مش عاوزة اقول لكم علبة كبيرة كريم لليد الاستاذ دَبْ يده فيها و رمى نصها بره و انا رميتها كلها بعد كده ..معجون الاسنان تم تفريغ اكثر من نصف الانبوبة.. كان معايا علبة فيها صابون بودرة طبعا دي كانت لُقطة و كنز بالنسبة له 😀 قلت للاستاذ على فكرة هات شوية ميه و حط من اللي في العلبة ده صابون.. 
طبعا نظرة ماكرة تم توجيهها لي!
و كل ده بنسأل في ايه و لا حياة لمن تنادي ..
المهم في الاخر جه رئيس الوردية و بدا كل واحد فيهم يوضح انجازته في التفتيش طبعا طلع نقبهم على شونة و كل اللي أنا أوضحته بكلامي للشخص اللي كان بيفتش قاله رئيس الوردية بالحرف.
بعد كده سألت رئيس الوردية هو في ايه؟!
قالي “سلطان نط على شنطتك و شنطة زميلك في الكونتينر ..فقلنا بس فيها ممنوعات"🤔
قلت له كده يا سلطان ده انا باحبك.. تعمل فيا كده 🤨
و بعد كل ده و بعد ثبوت البراءة و اننا -انا و زميلي- انظف من الصيني بعد غسيله تم تحويل كل واحد منا احنا الاتنين تفتيش ذاتي!
و كل ده بسببك يا سلطان 🐕
💖
من ذكريات المهنة

تعليقات

إرسال تعليق

المشاركات الشائعة من هذه المدونة

صورة
في العلاقات العاطفية بين البشر هناك إشارات يتم ارسالها دون وعي من اطرافها او بالاصح عدم ملاحظاتهم لتلك الإشارات المتمثلة في تصرفات طرفي العلاقة .. يحدث ان يختلط الأمر على احد أطرافها فيظن انه امتلك الطرف الآخر الذي تدل تصرفاته على شدة حبه و تمسكه بالعلاقة و محاولة المحافظة عليها و عليه فهو له كامل الحق في التصرف في مشاعر هذا المُدَله في حبه و اللعب بها و الاستمتاع بعملية الدفع و الجذب .. و الحقيقة ان الاحتمال له ذروة و زي الست ما غنت للصبر حدود   و عليه يأتي الوقت الذي يرفع هذا المُدَله في الحب يده قائلا  سلام … الموضوع انتهى يحدث ان يتصرف طرف بكل صدق و وضوح فيظن الطرف الآخر ان هذا ضعف و قلة حيلة و ان هذا الوضوح و الصدق هو شأن صاحبهم .. يعني انت اللي بتتصرف كده و انا مختلف عنك و عليه تتحمل نتيجة هذا التصرف.. و الحقيقة انه فعلا كل واحد بيتحمل نتيجة تصرفه و يحصد ما زرع و لكن احيانا بتكون الزراعة في ارض صخرية يحاول اصلاحها فيفشل.. و هنا يأتي الوقت الذي يكتشف فيه هذا الصادق  ان كل محاولاته ذهبت أدراج الرياح فيرفع يده  سلام  ... الموضوع انتهى و يحدث ان تكون العل...
قراءة المزيد
صورة
دَعْ كلَّ قلبٍ في الحياةِ على هواهْ فلكلِّ قلبٍ في الحياةِ حَياةْ والعشقُ بالنيَّاتِ يأتي إن أتَى ولكلِّ قلبٍ في الهوى ما قد نَواهْ مهما بَكينا في الهوى مِن جُرحِنا مهما تَمادتْ في القلوبِ الآهْ سنظلُّ دومًا أوفياءَ لجُرحِنا إن الجراحَ مساجدٌ للهْ فيها المناسكُ للقُساةِ قلوبُهم حتى تَحِنَّ وفي الحنينِ صلاةْ شقَّتْ دُموعي فجأةً وقتَ التضجُّرِ بَسمةٌ فسألتُهم : مَن شقَّها؟ مَن شقَّني في الحبِّ ؟ يا حُبَّاهْ ! ضَحِكَتْ وقالتْ بعدَها : لا تَبتئسْ "موسى" وألقَى في الدموعِ عصاهْ أنا دعوتي للهِ كانتْ صادقةْ يا ربَّنا قد مسَّني شوقٌ على شوقٍ فزدْني في الهوى شوقًا لها حتى نَذوقَ من الجوى ضِعفَ الذي ذُقْناهْ واغفرْ لقلبي في الهوى ما قد تقدَّمَ أو تأخرَ واهدِني واصدُقْ لقلبي في الهوى رُؤياهْ قولوا لمن مِني اشترتْهُ في الحياةِ بِحُبِّها القلبُ عندَكِ فاكرمي مثواهْ ولتعلمي إن كانَ ذنبي في الحياةِ بأسرِها حبي لكِ .. فاللهُ يعلمُ أنهُ ذنبٌ وحيدٌ ما ارتكبْتُ سِواهْ #عبدالعزيز_جويدة painting by: Nathalie Mulero Fougeras - French
قراءة المزيد
صورة
  "يا ترى اللي بيعيش الزمن إحنا ولاّ الزمن هو اللي بيعيشنا" سيد حجاب   رؤيتي هي ان احنا بنعيش زمن ما و بعد ان ينقضى هذا الزمن يعيش هو فينا  اي دقايق جميلة شعرنا فيها بالحياة.. اي لحظات سعيدة احسسنا فيها بالفرحة.. اي ثواني تنسمت فيها عيوننا رؤية احبابنا .. الوقت ده هو الزمن اللي إحنا بنعيشه ..  لما نتذكر هذه الاوقات الحلوة و الايام الهنية.. الوقت ده بيكون الزمن هو اللي بيعيشنا ..  الذكرى هي الزمن اللي عايش فينا         توتة
قراءة المزيد