لكل شعب من شعوب العالم أكلة تميزه عن غيره و يُعرف بها و بتكون علامة مميزة للشعب ده.. فمثلا الكرواسون و كل المعجنات لا يمكن تذوق طعمها الأصلي الا في فرنسا هي و الـ ٤٠٠ نوع من الجبن !.. و مهما أكلتها خارج فرنسا مش ممكن يكون نفس الطعم 🙃
و البايلا «و معناها بواقي الأكل و أصلها من مدينة بلنسية الأندلسية »
و هي الأكلة الأشهر في إسبانيا المكونة من الارز و فواكه البحر و الأسماك .. طعمها علي البحر هناك حاجة خرافة 😋
البيتزا و المكرونات بأنواعها في إيطاليا.. أعتقد ان الدقيق و نوعه له أساس في هذا التميُز..🤗
و بحكم عملي ذقت أنواع الطعام المختلف في كل البلاد اللي زرتها و الحقيقة أقول انه مهما قُدمت الأكلة في بلد غير بلدها بيكون لها طعم مخالف حتى الفول و الطعمية خارج مصر لهما طعم مختلف.
و اللي نبهني للمعلومة دي صراحة هو شاب مصري بسيط كان يعمل في مطعم بمدينة جدة و كنت اشتري منه سندوتشات الطعمية و سألته مرة عن سر الاختلاف في لونها و طعمها في جدة عن مصر فكانت إجابته الفول غير و الخضرة غير و المياه غير و الزيت غير يبقى الطعمية لازم تكون غير 😀
قلت له الله ينور💡
و سبب الكلام ده هو تجاربي في المطاعم المختلفة سواء في مصر أو بره مصر في البلاد اللي زرتها و حاولت تجربة الأكلات في بلدان مختلفة عن الموطن الأصلي لها ..
مثلا مرة كنت في باريس و كان معي زوجي و ابنتي و قلت لهم نتعشى في مطعم هندي .. و رحنا نتعشى و قلت لهم استنوا أنا هاختار لكم الأكل و طبعا كان عندي خبرة سابقة من رحلاتي للهند بمدنها المختلفة ..
معظم الأكل الهندي يتميز بالبهارات و استخدام الخضروات و البقول و طبعا في لحوم و اسماك و دواجن .. بس خارج مصر لا يمكن أن أكل اي لحمة او دجاج.. لكن فقط الأسماك و ملحقاتها .. المهم في أكلة هندية لذيذة جدا اسمها «DAL».. عبارة عن العدس البني تطبخ بطريقة معينة طلبتها و طلبت كذا حاجة جنبها و لما وضعت الأطباق نظرت للطبق و قلت دي مش الأكلة اللي أعرفها و طلبت مديرة المطعم و جاءت و هي ترتدي الساري الهندي تماشيا مع أجواء المكان و قلت لها ده مش «DAL» قالت لي لأ هي.. قلت لها لأ علشان انا أكلتها في الهند و مكونتها كذا و كذا و اللي قدامي ده حاجة تانية ..
الست حست اني فاهمة فقالت لي الفرنسيين بيحبوا يشوفوا مكونات الوجبة .. قلت لها مش ده موضوعنا.. الموضوع ان دي مش الأكلة الأصلية المعروفة.. و صراحة لما هي حست انها انكشفت قالت لي على حساب المحل..
و مش ده كان قصدي خالص.. و الطبق مش كان له طعم صراحة.
في بلدنا الحبيب بقي حدث و لا حرج 😊
في مطعم كان شهير جدا يوما ما و اخترع هذا المطعم ركن سندوتشات تطلبها و تاخدها و انت ماشي و كان من ضمن قائمة السندوتشات دي ساندوتش جمبري بصوص «التارتار» و ده صوص مخصوص للمأكولات البحرية سمك.. جمبري.. فواكه البحر.. الخ.
طلبت ساندويتش و كان في دكة صغيرة تجلس عليها لحد ما يخلص الطلب .. المهم قعدت على الدكة دي و أكلت أول قضمة فين التارتار صوص🤔؟! ..
مفيش .. قلت أجرب تاني ..نفس النتيجة صراحة لم اتمالك نفسي قلت للشخص اللي بيسلم الساندويش فين الشيف عاوزة اكلمه ؟
خرج الشيف و سألته فين الصوص ؟..
رد عليَّ حضرتك عارفة مكونتها ..
قلت له اينعم 🤨
فقالي لي اهه خيار مخلل و مايونيز و صفار بيض و باقي المكونات مش عاوزة اوجع دماغكم ..
قلت له تمام يعني حضرتك حاطط المكونات و انا اعملها تارتار صوص في بوقى ده كلام يا حضرة الشيف !😏
مرة تانية مطعم محترم برضه طلبت شوربة الحريرة مش لها أي علاقة بشوربة الحريرة و حوار ممل مع الشيف ..
و أخيرا مطعم تابع لفرنسا طلبت قطعة من الجاتوه هو الوحيد اللي بيعملها
و أنا باكلهاحسيت حاجة مش عاوزة تتمضغ قلت يمكن من البيكام - نوع من المكسرات- اللي المفروض مخلوط مع الكريمة لكن لما خرجتها لقيتها قطعة كرتون.. 😟
طبعا طلبت مدير الوردية قعد يتكلم و يفتي و يقول كلام انه عارفني و شافني في الفرع الفلاني و الفرع العلاني اللي عمري أصلا ما رحتهم و انا في سري أقول له
يا بني انت جاي تبيع الميه في حارة السقايين ..
لما خلص كلامه عرفته بنفسي و بأني فاهمة المكونات و ازاي بتتعمل .. الخ
و فصصت له الموضوع فقال لي حضرتك مش تركتي فتفوتة في التحليل
قلت له ما هو انت جاي تبيع الميه في حارة السقايين و ده مش ينفع يا جميل انت😁 ..
أنت تعتمد على عدم معرفة الزبائن بأصناف الطعام المقدم لهم أو جهلهم بوصفات طبخه ده جهل من حضرتك يا صاحب المطعم و قلة احترام لهم و فقدان لمصدقايتك و في النهاية هروب الزبون اللي وثق في مطعمك.
خلاصة الكلام ان الأكلة مش بيكون لها طعم الا في بلدها و يمكن كمان لو انتقلت من بلدها في نفس الدولة مع توافر و تماثل كافة المكونات الا ان طعمها في مكانها الأصلي لا يُعلى عليه
💖

تعليقات

إرسال تعليق

المشاركات الشائعة من هذه المدونة

صورة
في العلاقات العاطفية بين البشر هناك إشارات يتم ارسالها دون وعي من اطرافها او بالاصح عدم ملاحظاتهم لتلك الإشارات المتمثلة في تصرفات طرفي العلاقة .. يحدث ان يختلط الأمر على احد أطرافها فيظن انه امتلك الطرف الآخر الذي تدل تصرفاته على شدة حبه و تمسكه بالعلاقة و محاولة المحافظة عليها و عليه فهو له كامل الحق في التصرف في مشاعر هذا المُدَله في حبه و اللعب بها و الاستمتاع بعملية الدفع و الجذب .. و الحقيقة ان الاحتمال له ذروة و زي الست ما غنت للصبر حدود   و عليه يأتي الوقت الذي يرفع هذا المُدَله في الحب يده قائلا  سلام … الموضوع انتهى يحدث ان يتصرف طرف بكل صدق و وضوح فيظن الطرف الآخر ان هذا ضعف و قلة حيلة و ان هذا الوضوح و الصدق هو شأن صاحبهم .. يعني انت اللي بتتصرف كده و انا مختلف عنك و عليه تتحمل نتيجة هذا التصرف.. و الحقيقة انه فعلا كل واحد بيتحمل نتيجة تصرفه و يحصد ما زرع و لكن احيانا بتكون الزراعة في ارض صخرية يحاول اصلاحها فيفشل.. و هنا يأتي الوقت الذي يكتشف فيه هذا الصادق  ان كل محاولاته ذهبت أدراج الرياح فيرفع يده  سلام  ... الموضوع انتهى و يحدث ان تكون العل...
قراءة المزيد
صورة
دَعْ كلَّ قلبٍ في الحياةِ على هواهْ فلكلِّ قلبٍ في الحياةِ حَياةْ والعشقُ بالنيَّاتِ يأتي إن أتَى ولكلِّ قلبٍ في الهوى ما قد نَواهْ مهما بَكينا في الهوى مِن جُرحِنا مهما تَمادتْ في القلوبِ الآهْ سنظلُّ دومًا أوفياءَ لجُرحِنا إن الجراحَ مساجدٌ للهْ فيها المناسكُ للقُساةِ قلوبُهم حتى تَحِنَّ وفي الحنينِ صلاةْ شقَّتْ دُموعي فجأةً وقتَ التضجُّرِ بَسمةٌ فسألتُهم : مَن شقَّها؟ مَن شقَّني في الحبِّ ؟ يا حُبَّاهْ ! ضَحِكَتْ وقالتْ بعدَها : لا تَبتئسْ "موسى" وألقَى في الدموعِ عصاهْ أنا دعوتي للهِ كانتْ صادقةْ يا ربَّنا قد مسَّني شوقٌ على شوقٍ فزدْني في الهوى شوقًا لها حتى نَذوقَ من الجوى ضِعفَ الذي ذُقْناهْ واغفرْ لقلبي في الهوى ما قد تقدَّمَ أو تأخرَ واهدِني واصدُقْ لقلبي في الهوى رُؤياهْ قولوا لمن مِني اشترتْهُ في الحياةِ بِحُبِّها القلبُ عندَكِ فاكرمي مثواهْ ولتعلمي إن كانَ ذنبي في الحياةِ بأسرِها حبي لكِ .. فاللهُ يعلمُ أنهُ ذنبٌ وحيدٌ ما ارتكبْتُ سِواهْ #عبدالعزيز_جويدة painting by: Nathalie Mulero Fougeras - French
قراءة المزيد
صورة
  "يا ترى اللي بيعيش الزمن إحنا ولاّ الزمن هو اللي بيعيشنا" سيد حجاب   رؤيتي هي ان احنا بنعيش زمن ما و بعد ان ينقضى هذا الزمن يعيش هو فينا  اي دقايق جميلة شعرنا فيها بالحياة.. اي لحظات سعيدة احسسنا فيها بالفرحة.. اي ثواني تنسمت فيها عيوننا رؤية احبابنا .. الوقت ده هو الزمن اللي إحنا بنعيشه ..  لما نتذكر هذه الاوقات الحلوة و الايام الهنية.. الوقت ده بيكون الزمن هو اللي بيعيشنا ..  الذكرى هي الزمن اللي عايش فينا         توتة
قراءة المزيد